Алаг үзэл

За уул нь иймэрхүү юм бичдэггүй, хол ойрын хор шар, хоёр чихний хов живнээс ангид эрхэмсэг блог юмсан. Одоо яая гэхэв, бухимдлаа гээд ямар бууранд очиж гонгинолтойм биш. Байгаа ганц талбартаа бар шиг хүрхэрч, батгана шиг дүнгэнэхгүй бол блогтой байхын хэрэг юун. Таалахгүй нэг нь алгасаад уншчихаарай, тархинд чинь цус харваж магад.

Ажлын өдөр яаж эхэлж байна уу гэхээр, ааш хөдлөснөөр эхэлж байна. Ааш нь хөдөлсөн хүнээс аятайхан харьцаа гарах уу? Гарахгүй. Сайхан харьцаагүй ажилтан сайн юм хийх үү? Хийхгүй. Уурандаа улаан галзуу юм чихээд байхаар улс орон хөгжих үү? Хөгжихгүй. Энийг ойлгохгүй хүн гэж бас байх юмаа.

Өглөө ирэнгүүтээ өвгөн даргын нүдийг ажиж өдрийн өнгийг шинжиж тодорхойлно. За тэгээд над шиг заяа муутай амьтанд нар гийж, наймаалж зулзагалах өдөр бараг л байхгүй. Ихэнхдээ удирдах ажилтнаас зэмлэл хүртэх буюу урдах чулуундаа бүдэрч унана гэж од гариг эрхшээх юм.

Уул нь манай дарга тийм ч муу хүн биш л дээ, мэдлэгтэй бол мэдлэгтэй, мэдрэлдээ юмтай гэвэл юмтай. Хэл ус сайтай, хэг ёг хийхдээ мэргэжлийн. Даанч, харсаар байхад ав адилхан хоёр хүн байхад чинь нэгийг нь илүүд үзээд нөгөөг нь доош хийгээд байхаар цээж хага дэлбэрч цэр мулт үсрэх шахаж байна.

Дарга ингэдгийн, нөгөөх рүү хараад “Гүй чи чинь хааччихваа, утас мутсаа ч авахгүй юм. Бие хаа чинь зүгээр үү. Болж бүтэхгүй юу байна? За за одоо тийшээ яваад тэрэнтэй уулзаад тийм юм хийгээрэй” гээд л яаж хичээж гаргасийн гэмээр ялдам хоолойгоор донжтой нь аргагүй донхолзоно..

Гэтэл над руу дурамжхан хяламхийх зуураа “За чи юу хийж байна? Юу хийх гэж байна? Тэрнийгээ хий. Өчигдөр яагаад тийм тийм юм тэгж тэгж хийгээгүй юм” гүйцээ. Өөр юу ч хэлэхгүй, би одоо хаашаа юм, сайн дураараа салбайж гүйгээ дадлагын оюутан юмуу, даргын фен юмуу аль эсвэл ажил цалгардуулагч, амаа билүүдэгч, арваалжин өт юмуу. Үгүй бол яршиг жаргах замын садаа минь ээ жаал зугаа юмаа аваад зайлаад өгвөл яасийн бэ гээд хэлчүүл явна шд. Ямар түмэнд нүүрээ барж, олонд омгоо үзүүлсэн амьтан байгаа биш. Яахаараа хүнийг ингэж царай зүс, цалин мөнгө, чадвар боломж, чалх чадамжаар нь ялгадаг байнаа.

Гэдэг гэдэг алхаад гэдийж ирээл үглэхээр нь гэзэг үсээ зулгааж, гилгэр хөмсөгөө хусмаар болохын. Аль юм болгон арзайж уурлахав гээд аргаа барахдаа даргадаа зориулж хоёр бадаг шүлэг зохиолоо шд.

Миний даргын хөл /гарчиг нь/

Миний даргын хөл
Шилбэ нарийн зураастай
Шивэр анхилам үнэртэй
Шивтэр арвин оймстой
Ширэн зузаан эвэртэй

Миний даргын хөл
Майраг сайраг алхаатай
Манийг үргээх нүргээтэй
Мярайж гэтээд дөхөхөөр нь
Мянган шоргоолж бултмаар аа

гэжугам чинь. Өө тийм, бас багачууддаа зориулж дуу зохиосийн байна.

Жижигхэн гацуурхан дууны аяаар дуулаарай

Өндөрхөн, үглээхэн
Өвгөн дарга байдаг даа
Ууртайяа хэрүүлтэй еэ
Угтацгаадаг шинэ өдрөө

Ажлаа би хийдэг дээ
Аман дотроо үглэдэг дээ
Даргаа муулаад хэлээ гаргаад
Дандаа сайхан баясдаг даа

гээл. Энэ Идеа эргүү өвчин тусчихаж гэж битгий бодоорой. Яахав хүн ядрахаараа янз янз болдог юм байна, яахаа ч мэдэхгүй янцагладаг юм байна. Хүнтэй муудаж өрөө өрөөгөөр нэг өндөглөх гэж байгаа тахиа шиг гуагчиж гүйснээс мөрөөрөө мөөмөө савчуулаад, боломжоороо блогоо бичээд сууж байсан нь хамаагүй дээр байх юм.

Яанаа миний энийг хүн харчихвал ажил ч үгүй, амьдрал ч үгүй, ааштай дарга ч үгүй, арзгар толгой ч үгүй болохоо мэдэхгүй л сайхан ангалзаж байна даа, энэ хүүхэн. "Үхэл нь ирсэн хулгана муурын сахлаар наадна" гэгчээр өнхөрөх дөхсөн Идеа өвгөн даргаараа дайжигнав. Битгий л мэдчихээсэй билээ, базар вааний хумпад, барианы шилтэй компод...