Хонь хадгалж үлдсэн минь

Наадмын хэдэн өдөр чухам хөнжилдөө унтах завгүй хөөрцөглөн ажилласан хөтлөгч найзад маань өчигдөр яаралтай ажил гарч, хугас өдөр эфир зогсоочилгүй явуулж байхыг надаас гуйлаа. FM байгуулаад удаагүй байгаа болохоор хөөрхий минь өөрийн юм өргүй гэгчээр тэгж өдөр шөнөгүй зүтгэсэн хэрэг л дээ.



Би ч яахав, айраг цагаа, айлын залуу эргүүлсэн шигээ сайхан амарсан хүн үгүй гэж чадсангүй. Халуун наранд шарагдаж хар дээрээ халтар, бор дээрээ борц болсноо ч тоохгүй, араажаваар ямар нүүр харагдах биш гээд л ангайж мэлийгээд үлдлээ.

Баахан дуу явуулаад, баярын голдуу хэдэн мэндчилгээ завсраар нь шургуулаад байж бай, битгий илүү олон юм яриарай гэсэн захиасыг чанд сахиж ажилдаа оров. Миний явуулсан мэндчилгээнүүдээс хальт сийрүүлбэл:

* * *
Наадмын барилдаанаар 20 сая төгрөгний найраа амжилттай хийж, начин болсон найздаа зориулж УГЖ Жаргалсайханы дуулсан “Тамирчны алдар хямдхан олдоогүй” дуугаар ая баръя.
* * *
Хэвтэрт ороод удсан өвөөдөө зориулж “Хурд” хамтлагийн “Алив бос” дуугаар мэндчилгээ дэвшүүлье.
* * *
Цэнгэлдэх хүрээлэнд үүлэн чөлөөний нар шиг хальт үзэгдээд өнгөрсөн Ерөнхий сайд С.Баярт зориулж блогчин Idea-гийн зохиосон “Таны эзгүй наадам” шүлгээр бадаг өргөж байна.
* * *
Кальц дутагдсанаас ясны сийрэгжилтэнд орж яваа эмгэн буурал ээждээ зориулж дуучин Батсүхийн дуулсан “Жилээс жилд жижгэрсэн жаахан буурал ээж минь” дуугаар дуун хадаг баръя.
* * *
Хамгаас хайрт хадам ээждээ зориулж, СТА Баясгалангийн дуулсан “Ээжийг минь яаж гүйцэхэв дээ” дуугаар мэндийн ерөөл дэвшүүлье.
* * *
Гоо сайхны хагалгаанд орон давхраа хийлгэсэн найз Урангоодоо зориулж Амаржаргалын дуулсан “Давхраатай алаг нүд чинь ээ хө Даанчиг сайхан тормолзоно” дуугаар ая барьж байна.
* * *
Чихэндээ аппарат зүүсэн найзынхаа үерхдэг охинд нь хандаж “Явлаа гэж чанга битгий хэлээрэй” дуугаар мэндчилж байна.
* * *
Хурхирч унтдаг ахдаа зориулж Ш.Гүрбазарын үг, Л.Балхжавын ая “Хар дарахаас минь өмнө сэрээгээрэй” дууг зориулъя.
* * *
“Монгол шуудан” компанийн 30 жилийн ойг тохиолдуулан хамт олондоо “37 дахь захидал” дууг УГЖ Ариунаагийн дуулснаар хүргэж байна.
* * *
Сонгуульд Баянзүрх дүүрэгт нэр дэвшсэн өрсөлдөгчиддөө зориулж нэр дэвшигч Б.Мөнхтуяа, Т.Ганди нараас дуучин Отгоогийн уулсан “Эрчүүдийг үзэн ядах сэтгэлийг надад өгөөч” дууг зориулсныг манай FM дамжуулж байна.
* * *
80 насных нь ой тохиож буй азай буурал өвөөдөө зориулж "Нисванис" хамтлагийн "Булш" дуугаар ая баръя.
* * *
Найрын ширээ засахаар нусаа хацартаа нааж үлдсэн дүү нартаа зориулж “Ерөөл-тэй орчлон” дууг УГЖ Баясгалангийн дуулснаар эгшигэн хадаг болгоё.
* * *
Хөдөөнөөс дөнгөж хотод орж ирсэн өвгөн эмгэндээ зориулж, хөгшин хүнд арай зөөлөн юм гэж “Люмино” хамтлагийн “Бамбалзана, бумбалзана” дуугаар мэндчилгээ дэвшүүлж байна.
* * *
Ганц худагийн урьдчилсан хорих төвд саатуулагдсан шинэхэн танилаа “Гэртээ ирлээ” дуугаар ая барин угтаж байгаа хэсэг хоригдлын хүсэлтийг манай радио уламжилж байгаадаа таатай байна.
* * *
Сүргийн манлай явсан сэтэр халзан сэрхэндээ зориулж, малчин эзнээс нь “Манлай явсаныг чинь мартахгүй” дуугаар ая дууны мэндчилгээ явуулжээ гэх мэт...

... Хөтлөгч хийж, хөгөө хөлдөө чирсэн тухайд нэг иймэрхүү. Загнуулахаас айгаад зарим фактаа нуучихаад байгаа нь энэ. Эцэст нь надад итгэж ажлаа үлдээсэн найздаа хандаж “Уучлаарай хө. Хөгшин нь жоохон сахилгүйтчихлээ. Гэхдээ чононд хонь хадгалуулсан чиний л буруу” гэж хэлье дээ.